حاولت كتير انى اقتنع بكلام شباب الثورة بس بصراحة مش لاقية اى حجة او سبب يخلينى ارفع فى هذة الفترة الحرجة الى بتمر بيها البلد علم تانى غير علم بلدى .. اكيد انتو مش فاهمين انا بتكلم عن ايه .. هحكيلكم القصة من اولها ..فى بادئ الامر ان كل ما تمر به البلاد من ظروف سواء انتم شايفنها كويسة او وحشة بتنسب للشباب و الفضل كل الفضل لشباب الثورة الطائش احيانا و المتعقل الاحيان الاخرى فى كل تقدم او تاخر تصل اليه البلاد (( لكم ارائكم و لى اراء ))
المهم الموضوع بدأ بأنى فى يوم و انا قاعدة فاضية و مورايش حاجة و برخم على صحابى على الفيسبوك لقيت اذ فجأة اتبعتلى ايفينت اسمه عل قدس رايحين شهداء بالملايين .. فى البداية مقدرتش اوصل الايفينت ده قصده ايه !! قولت يمكن حرب نفسية لاسرائيل يعنى كدة بنخوفهم مثلا ! .. بس بعد شوية لقيت ان الشباب واخدهم الحماس جدا و بجد عايزين يروحوا على الحدود الفاصلة بينا و بين فلسطين ,, مخدتش فى بالى و خلصت يومى و دخلت انام
صحيت من النوم على مكالمة صاحبتى بتقولى بسرررررررعة افتحى قناة كذا و شوفى الناس فى التحرير .. فتحت لقيت الناس بتصلى فى النحرير الفجر و بتعيط و بتدعى لفلسطين قلت هو الحرم جه التحرير !! و لا ده فى الحرم يعنى !! لا لا لا هو التحرير طب هو التحرير بقى مكان مقدس الدعاء سالك من التحرير ل ربنا !!! سكت و قلت يلا ميجراش حاجة هيمشوا بعد الصلاة . شوية و لقيتهم بيقولو عل قدس رايحين شهداء بالملايين .. قلت بيهزروا ... بعدين لقيت ناس قدام سفارة اسرائيل و ماسكين اعلام ولا كأن فلسطين اخدت كاس العالم و اللى بيدوس على علم اسرائيل و اللى بيحرقوا !!!!!!!!!!!!
فى الوقت ده كان نفسى اسأل واحد من الشباب اللذيذ ده هو انت لما بتدوس على العلم هما بيرجعوا لورا ؟
ولا لما بنحرق العلم بنصغر مساحة اسرائيل ؟؟
هى الناس دى بتتكلم بجد ؟؟ باى وجه حق عايزين يروحو و يحاربوا و يدافعو عن بلد عربى تانية ؟؟ ماشى اشقاء على عينا و راسنا بس يعنى هو انا هروح انضف شقة اختى و انا اصلا شقتى مدودة و متربة و مليانة بكل ما تشتهيه الانفس ؟؟؟؟؟
طبعا هو شعور طيب جدا من الشباب انهم يفكروا فى حاجة زى دى .. بس مش معنى ان الثورة نجحت على حد ما هما بيقولو و هيا كانت من دون ترتيب او تخطيط او اتعملت بتلقائية و حققت مطالبهم يبقى اي حاجة عايزنها تبقى هيلا هوب يلا نعمل !! اصلها مش سفارى يعنى فهنقول بلا ميسد لمروة و محمد و يوسف و هنروح عل حدود .. الفكرة اكبر من كدة ..
و المشكلة الاكبر فى الرموز اللى بيدعموا الشباب دول .. طب لو قولنا طيش شباب اين انتم ايها الرموز من المسئولية !!! هل هنروح عل حدود بالاعلام و بس !
ما هو اصل احنا يا جماعة مش رايحين ماتش كورة فى الاستاد .. الزحف عل حدود ده ممكن يكلفنا ارواحنا و مش بس ارواحنا ده ممكن يدخلنا العدو لحد عندنا !!
لما طرحت راى ده قدام ناس من انصار الشباب اللى رايحين القدس .. اتهمت بكل انواع الخيانة و انى مش مسلمة على حق و انى راضية باللى بيحصل فى فلسطين ! ..
فكان ردى بسيط جدا قولتلهم يا جماعة انا موافقة ان احنا نروح و ندخل اعماق فلسطين و نحارب بس هنحارب ب ايه ؟؟؟؟؟؟؟؟؟؟
رد عليا واحد خلانى اتنطت فى مكانى .. قاللى ربنا هينصرنا و كم من فئة قليلة غلبت فئة كثيرة بإذن الله .. قولتله حلو بس هتغلبوهم ب ايه و هما متفوقين علينا فى العلم و الصناعة و كل المجالات ؟؟؟؟؟؟
مسمعتش منه بعد كدة رد اقنعنى فسكت و متكلمتش
كل اللى بطلبه من شباب مصر العظيم ان هما يركزوا جوة البلد و يحررونا من الجهل و الفقر و التخلف اللى عمال يزيد يوم بعد يوم و لما نفضى بقى و تبقى مصر دولة عالم اول ساعتها ممكن نفكر نلم اخواتنا العرب الحلوين ما هو مش لوحدنا كدة هنروح يعنى ما احنا مش سبع رجالة فى بعض ماشى جيشنا ربنا يبارك فيه بس برده مش احنا المصلحين الاجتماعيين يعنى بلاش بس الرجولة تاخد حدها معانا و ننزل من سماء الخيال الى ارض الواقع .
