اكيد الاحداث اللى بتحصل دلوقتى هى اللى مسيطرة على ساحة الحوار على جميع الاصعدة
فانا طبعا كونى لسانى و الحمد لله طولى و يمكن اطول شويتين مقدرش اسكت و اكتم فى نفسى كدة
فقررت ادخل فى حوار مع ناس من جميع القطاعات فى المجتمع بداية من طنط بتاعة الطماطم مرورا بسواق التاكسى و كباتن فى الكورة وصولا لحد ذو شأن فى البلد بدون ذكر مكانته .. المهم ان طنط بتاعة الطماطم هى اللى ردها ذهلنى الحقيقة لقيتها بتقولى و بكل بساطة : و الله يا انسة ولا يوم من ايام الريس كنا بنبقى مش خايفين
اما بقى عمو سواء التاكسى فكان على قدر شوية من الثقافة فكان وجهلى سؤال بس مدنيش فرصة انى ارد ! قاللى تفتكرى يا ابلة ممكن الحرامية دول يخرجوا من السجن ؟؟ و قبل ما اجاوب لقيته بيقولى يا لهووووى ده يبقى فيلم عربى و البلد هتبقى عبارة عن اضرب و لاقى ! فقولتله نعم !! قالى ايوة يعنى هيبقى فيلم عاد لينتقم
قولتلو عموما ربنا يسترها بس بصراحة الراجل قلقنى اصل فعلا جمعتهم فى مكان واحد دى مش حلوة .. ما علينا المهم حاولت انى اوصل لسبب اللى احنا فيه ده فقولت يلا يا نونه بصى بصة عميقة شوية عل بلد لقيت ان مصر بعد ثورة 25 يناير البيضاء عبارة عن : لقيت يا اما ناس مركزة اوى فى السياسة يا اما ناش مش هنا اصلا و راحت منهم و مرجعتش !!
لقيت ان الاحداث فى مصر على مستوى الناس اللى راحت منهم
يقولك مثلا المدير الفنى لنادى كذا ينتوى مقاضاة فلان لاتهمامة بالسب
نادى معرفش مين يعانى من الظلم التحكيمي
او مثلا الفنانة معرفش مين هتعمل مسلسل
او القاضية الكبرى بقى الفنان فلان بيعمل اغنية حبيبتى قابلتها فى الثورة
كدة يعنى
اما على مستوى الناس اللى مركزة فى السياسة :
خلافات بين المؤيدين و المعارضن للرئيس السابق مبارك
تراشق بالحجارة بين المسلمين و المسيحين عند كنيسة كذا او جامع كذا
مشادة بين الاخوان المسلمين و السلفيين فى مصر
الاقباط يقطعون طريق معرفش ايه
طب ما نخلينا عقلانين و نشوف اللى بيحصل ده لصالح لمين !!!
بس المشكلة فينا كمصريين ان احنا مش بنبص للامور من بره احنا من و احنا قاعدين و متكربسين فوق بعض جوة الموضوع بنحكم عليه و كل يغنى على ليلاه
يعنى لو بصينا للشعب و قسمنا مسلم و مسيحى .. هنلاقى المسلمين يقولو امريكا هى السبب
و يجوا المسيحين يقولا لاااااااا ايراااان و الاخوان و حماس
اما بالنسبة لو قولنا بقى مؤيدين و نعارضين .. هنلاقى ان المعارضين بيقولو دول فلول نظام و كأن فلول النظام دول قط بسبع ارواح او جن مصور هو اللى بيعمل كل حاجة فى البلد لدرجة انى حسيت لو اتخانقت انا و الحاجة هيبقى سبب اشعال الخلاف فرد من فلول النظام
اما بقى المؤيدين فهيقولو كله من امريكا بنت ال ...... او طائفة تانية من المؤيدين بتقول دى اعمال احد المرشحين بيعمل فوضى علشان يجى يلم الليلة و يبقى هو البطل المغوار و يكسب الناس
الفكرة اللى محدش قادر يوصلها ان احنا المــصــريــين كلنا فى مركب واحدة و مصيرنا كلنا واحد !!
يعنى بقى سواء ده بسبب ناس من امريكا ولا المنوفية مش دى الفكرة ! الفكرة اننا نعرف ازاى منخليش الناس دى تنجح لان اين كان هما مين .. هما ماشيين بسياسة فرق تسد
النظرية الاهم بقى انى لما قعدت مع صاحبتى (مسيحية) لقيت ان كلامها و تفكيرها هى و كل المسيحين العقلاء زى تفكير كل المسلمين العقلاء و بتتكلم زينا بالظبط و بتنتقد اللى بيحصل !
فبعد قعدتى معاها حسيت ان دماغى بتلفففف !!! لما المسلمين و المسيحين كانو جمب بعض فى امبابة و بيسالو مين اللى بيعمل كدة ؟؟؟ يبقى مييين اللى كان بيولع امبارح فى البلد ؟؟؟؟
اخيرا هقول يا خوفى لا نفوق متاخر اوى و ساعتها هنقول : لــقــد وقــعنا فــى الــفــخ
ليست هناك تعليقات:
إرسال تعليق